أبدى حازم إمام نجم الزمالك ومنتخب مصر الأسبق حزنه وغضبه الشديد من تصرف الفرنسى كارتيرون المدير الفنى السابق للزمالك، والذى فسخ تعاقده أمس الثلاثاء، مع الزمالك.
وقال حازم فى تصريحات له : مصر أصبحت بوابة المدربين الأجانب للوصول للشهرة والفلوس والتاريخ، ثم التوجه للخليج.
وفى برنامجه الاذاعى قال حازم : مكنش فيه مقدمات لرحيل كارتيرون، الأمور كانت ماشية على ما يرام ولأول مرة مكنش فيه أزمات بين المدرب والإدارة وفى بطولات واستقرار.
وواصل : مقلب كارتيرون مش مفهوم بالنسبالى، المدرب الذى يقدم على هذا التصرف وميحترمش تعاقده ويفسخه يبقى شخصية غير منضبطة، وممكن يكرر الموقف تانى وتالت .
واوضح : انا عارف أن الفلوس مهمة بس اختيار الوقت مهم بردو يعنى لو نهاية الموسم كانت ممكن تعدى ، وأتمنى يكون فى حل سريع من أجل أستقرار الزمالك.
وأضاف حازم : جمهور الزمالك مش طايق كارتيرون ، والإدارة بريئة من رحيله بل بالعكس قدمت كل مافى وسعها لإستمراره، واحنا بره مخضوضين ، يبقى وضع اللاعيبة ايه دلوقتى ، ربنا يكون فى عون المدرب القادم للزمالك .
واكد حازم ان كارتيرون لن يدرب فريق أخر فى مصر، مشيراً الى أن مصر أكبر مكان يمنح أموال للمدربين بعيداً عن الخليج .
واستطرد : المدربين يأتون أشباح باحثين عن أكل العيش ويرحلون بعد الشهرة والفلوس والتاريخ للخليج أو شمال أفريقيا ، بقينا سلم ليهم وياريت نركز مع المدرب الوطنى على الاقل عنده أصل وعمره مايسيب فريقه فى نصف الموسم ، على العكس احنا اللى بنمشى المدربين المصريين.
وأكمل حازم حديثه : عندنا نماذج ممتازه، وأكبر دليل إيهاب جلال مع المقاصة من القاع وأتوقع أن يصل للمركز الرابع وكذلك أحمد كشرى فى ربع موسم عمل من الفسيخ شربات مع اسوان.
واتم : كارتيرون أبلغ الزمالك برحيله قبلها بيوم ، وجه معاه الشرط الجزائى ودا معناه انه مرتب اموره، ولا أعتقد أنه سيقود بيراميدز حالياً ، ممكن يتولى تدريب بيراميدز فى بداية الموسم مش دلوقتى .
حتى لو بيراميدز عايز فايلر مدرب الاهلى بردو هيكون أول الموسم مش دلوقتى عشان الناس فى بيراميدز مش ساذجين يولعوا الدنيا بعد أزمة رمضان صبحى ، أتوقع انتقال كارتيرون للخليج وليس نادى مصرى.
