روى نجم الزمالك الأسبق أحمد حسام ميدو موقف طريف فى مباراته أثناء تدريب الفارس الابيض فى زامبيا.
وعلى حسب حكى العالمى، قال:
"أثناء تدريبي للزمالك في إحدي المباريات الافريقية روحنا نلاعب فريق "ناكانا" الزامبي، وكان "كالوشا" وزير الرياضة هناك، فالراجل كان حاجب جميع مباريات الفريق عن الإعلام قبل تلك المباراة، فروحنا وقتها علي أساس إننا هنلاعب فريق مجهول منعرفش عنه أي حاجة.. بالصدفة قابلنا مدرب مصري "كان مدير فني لإحدي الأندية هناك"، قالي انا معايا شريط لآخر مباراة للفريق ده، ممكن اديهولك بس بشرط متجيبش سيرتي في أي حاجة لإني هروح في داهية، وبالفعل في ليلتها جابلي الشريط ودخلته من الشباك عشان محدش يشوفه، وقعدت اتفرج ع المباراة وادرس الفريق بعدين اديته الشريط ومشي في الخفاء، بعدها قعدت أشرح للاعيبة طريقة لعبهم ونقط القوة والضعف وخلافه، فلقيت هشام يكن بيقولي "انت عرفت كل ده منين؟!" .. قلتله مدرب مصري هنا جابلي شريط لآخر مباراة ليهم، بس الكلام ده سر اوعي تقوله لأي حد، الراجل موصيني إنه هيروح في داهية لو الكلام ده طلع، قالي تمام والدنيا عدت... بعدها علي طول لقيت تصريحات منقولة علي لسان الكابتن هشام يكن في كل المواقع المصرية إنه بيوجه الشكر للمدرب المصري اللي ساعدنا في التعرف علي الفريق الزامبي ".
