|
فى مُداخلة هاتفية مطولة مع برنامج " كورة النهاردة", الذى يُقدمه الإعلامى أحمد شوبير, تحدث ممدوح عباس رئيس نادى الزمالك عن العديد من الأمور والقضايا التى تخص القلعة البيضاء, وتلخص حواره فيما يلى:-
- بعض أعضاء المجلس إنتهى زمانهم وندمان إنى إختارتهم فى قائمتى, بيعملوا دعاية إنتخابية أما يعارضوا بإستمرار ويطلعوا أسرار النادى بره .
- مفيش إنقسامات فى مجلس الإدارة, واللُحمة هترجع ليه من تانى, الإستقالة دى حق إنسانى لإن ده عمل تطوعى .
- أنا كنت صريح من البداية فى الأزمة المالية, وقولت إنى مش هدفع حاجة من جيبى لإن ده بيزود الأزمة مش بيحلها, وإحنا بنحاول نزود موارد الزمالك, رغم إننا النادى الوحيد فى مصر اللى صرف 65% من مستحقات اللاعيبة, ورواتب الموظفين عن شهر 9 قبل ما يبدأ .
- مش عاوز أفتح سيرة الإنتخابات دلوقتى ولسه مفكرتش إذا كنت هترشح ولا لا, لكن لو لقيت حد يقدر يشيل المهمة التقيلة دى هقوله إتفضل .
- زعلان جداً من حسن شحاتة, لإن مكانش ينفع يسيب النادى ويمشى بالطريقة دى, مفيش حد كبير على الزمالك وهو اللى عمل إسمه, لكن هو كان بيتعامل معاه على إنه وكالة من غير بواب, لكن الزمالك عمره ماهيكون كده, وولاده قالوله عيب اللى بتعمله, هو زعلان عشان موضوع شيكابالا, وأنا نفيته زى ماحصل مع عرابى, أعمل فيه إيه تانى أخرطه للوز !!!!!, وبعدين هو إزاى يعمل عقله بعقل واحد عنده 26 سنة أد إبنه, وهى مصر هتجيب كام شيكابالا .
- الزمالك مش بيتفرغ من نجومه برحيل شيكا وأحمد حسن وعمرو زكى, وهيتأثر بواحد بس منهم .
- أحمد حسن جالى مكتبى وقاللى عاوز أمشى ببلاش قولتله مش هينفع روح ليرس وهاتلى حسين ياسر المحمدى .
- فييرا مدرب فاهم وواعى ومريح عندة جدية وحسم وإلتزام, مهمتة مزدوجة مع الفريق وبيعمل حاجات كانت المفروض تتعمل من شهرين, بيزود اللياقة البدنية وبيصلح أخطاء الدفاع ونص الملعب, كل ده وهو أساساً بيجهز للماتشات, وماركو عاقل ومتزن .
- الجهاز الفنى هيستمر بغض النظر عن نتائج الماتشين اللى جايين, لإنى مش هسمح إن الزمالك يكون أضحوكة ويتقال إنه مشّى المدرب بعد شهر, وبعدين هو عمل إيه ؟!, ده جه ومسك " مصيبة " !!!! .
- فريق اليد " غلابة " أكبر عقد فيهم 400 ألف جنيه, لكن رجالة عندهم تصميم وروح قتالية ومصدر فخر لمصر كلها, رغم إنهم بيلعبوا أدام إمكانيات فنية ومادية أعلى منهم لكنهم بيتفوقوا عليهم, الفرقة دى عاصمة كرة اليد فى مصر وتُدرس لفريق الكورة .
- حسين زكى بيلعب فى الزمالك بدون مقابل وأنا بشكره, أيمن صلاح مدرب حاد جداً معندوش هزار أو إنفلات وواخد الفريق فى حضنه .
- بحب عائلة العدل جداً, لحبها الشديد المُتعصب لنادى الزمالك, وأنا مطلعتش بيان ضد مدحت العدل, لكن أنا بس رديت على كلام قاله فى جريدة .
- جمهور الزمالك على عينى وراسى, بس إحنا كمجلس إدارة قادرين ناخد قرارات صائبة, وفى النهاية هما 50 أو 60 واحد مش بيعبروا عن الـ30 مليون زملكاوى فى مصر .
- تذاكر الماتش متاحة للجميع عند النادى, طبعنا 4 آلاف تذكرة, 1000 للضيوف, و3 آلاف لينا, 2000 منهم فى الدرجة الثالثة وأنا طلبت إنهم يقعدوا فى نص الملعب مش على الجنب, والـ1000 الباقيين موزعين مابين المقصورة الرئيسية, والأولى ممتاز يمين وشمال .
شاهد الفيديوهات
|
