|
يتمنى محمود فتح الله مدافع الزمالك, إستمرار الجهاز الفنى الحالى بقيادة البرتغالى جورفان فييرا فى قيادة الفريق .
وقال فتح الله " محترم وكويس جداً, هو عارف الدنيا ماشية إزاى, ومن أول يوم بيشتغل على إنه يكسب حب اللاعيبة, معاه مدرب أحمال من أحسن المدربين اللى إتمرنت معاهم فى حياتى, الجهاز الفنى كله محترم وأتمنى يستمر, كده كده إحتمالات الدورى بعيدة فإيه المشكلة أما يقعد يومين يخلص مشكلته فى الإمارات ويرجع ؟ " .
ويرى المدافع الدولى أن الزمالك إستفاد كثيراً من وديتى شاختار الأوكرانى وزينيت الروسى, خاصة وأن كلا الفريقين كان يلعب بعناصره الأساسية .
وأضاف " الزمالك بقى فيه لاعيبة صغيرة تقدر تشيل الفريق, زى محمد إبراهيم وعمر جابر وعبد الشافى وصبرى رحيل ", مشيراً إلى أنه فى حالة حدوث أخطاء دفاعية, أثناء اللعب بأربعة فقط فى الخط الخلفى, فالأمر سببه تقصير من اللاعبين, ولا علاقة لذلك بالطريقة .
وأشار إلى أن الزمالك سيكون بحاجة لمهاجم حال رحيل رزاق أو سيسيه, بالإضافة لحارس مرمى مع عبد الواحد السيد, بعدما أصبح محمود عبد الرحيم جنش على أعتاب الإنضمام لنادى آخر, فضلاً عن أن الشناوى إنضم للأبيض على سبيل الإعارة لنهاية الموسم .
وأكد فتح الله على أن حسن شحاتة كان يرغب فى الفوز ببطولة مع الزمالك, مضيفاً بقوله " كأس مصر اللى خسرناه أدام إنبى قطم وسطنا كلنا " .
وتابع بقوله " إحنا مبناخدش بطولات, لكن نادى الزمالك إسم كبير أى حد يتمنى يخدمه ويلعب فيه أو يبقى رئيسه, مش عشان الدنيا مش ماشية معانا هيبقى مركز شباب " .
ورفض التطرق لمفاوضات غير موجود من جانب الأهلى لضمه, مُكملاً " أنا بلعب فى نادى كبير وإسم كبير ومبسوط إنى موجود فيه وعارف قيمته وحاسس بيها " .
وأشاد فتح الله بصفقة إنضمام أحمد عيد عبد الملك, مشيراً إلى أنه إضافة للفريق وكان يأمل فى ضمه منذ موسمين, مُعتبراً أن أيمن حفنى صانع العاب طلائع الجيش سيضيف للزمالك حال إنضمامه .
ولفت إلى أن أكثر المدافعين الذين يُفضل اللعب معهم هو عمرو الصفتى, أحد أكثر اللاعبين رجولة فى هذا المركز داخل الزمالك على حد قوله, مُشيداً فى الوقت ذاته بحماده طلبه وأحمد مجدى وصلاح سليمان, رغم أنه كان يتمنى ضم محمد نجيب مدافع الأهلى .
وأثنى المدافع الدولى على جماهير الزمالك قائلاً " لما جمهور ييجى رغم إنك بتخسر ويشجعك بنفس الحماس يبقى ده جمهور عظيم حاسس بقيمة وكيان النادى ", مُشدداً على أن على الإدارة والجهاز الفنى واللاعبين, حُب القلعة البيضاء أكثر من ذلك .
وحصر فتح الله إيجابيات روابط المشجعين " الألتراس ", فى عمل منظر جمالى بالمدرجات والتشجيع بنظام, فيما تتمثل السلبيات فى إبراز روح التعصب والعنف .
وأتم تصريحاته مُعرباً عن إستيائه مما تُعانيه الرياضة مؤخراً بقوله " الحاجة الوحيدة اللى بتفرح الناس بتلغيها طب إنت عاوز الناس تولع فى نفسها ؟, ليه الكورة مترجعش تانى محدش عنده سبب مقنع, لو فى حد بص لمصلحة مصر كان من شهرين تلاتة 5 شهور رجع الكورة, لكن ميبقاش منظرنا كده أدام الناس إننا مش قادرين نأمن الماتشات, يبقى إحنا منستاهلش نبقى أم الدنيا وزينا زى الصومال !! " .
شاهد الفيديوهات
|
