حالة سخط عام على المعلق الرياضى التونسي عصام الشوالى من قبل جمهور الاهلى بعد مباراة الاهلى والوداد بالامس فى ذهاب نهائى دورى أبطال افريقيا.
جاء هذا بسبب بعض العبارات التى قالها بالامس أثناء تعليقه على مباراة ذهاب نهائى دورى الابطال بين الوداد المغربى والاهلى.
وبمراجعة ما قاله الرجل أثناء تعليقه أكثر من مرة، هو قال فيما معناه ان الاهلى بيلعب "مريح" ومعندوش اجهاد بدنى نتيجة أنه مستريح فى الدورى المصرى.
قال .. الدورى المغربى دورى تنافسى قوى، والوداد خاض مباريات صعبة عكس الاهلى، الذى يلعب فى بطولة محسومة لصالحه.
وللحقيقة لا اعلم سر غضب جمهور الاهلى من هذه التصريحات، فهى الحقيقة نحن دورى يتم لعبه لصالح نادى واحد، وهذا شيء معروف لـ الاهلاوى قبل الزملكاوى والاسمعلاوى والقناوى والصعيدى وإبن اخوك البورسعيدى.
نادى يؤمر ويتحكم فى الكرة المصرية، عايز رعاية وماله، عايز تأجيل مباريات وماله، ايقاف عقوبات علشان خاطرك مش عيب، تغيير لوائح عادى.. كله ماشى.
كلام واقعى ومعروف للكل داخل وخارج مصر، منظومة رياضية لصالح نادى واحد، والباقى مش مهم يازينب.
اللى يزعل فى الموضوع واللى المفروض جمهور الاهلى واعلامه يزعل منه، إننا مفضوحين أوى قدام العالم، فى الكرة المصرية، دا اللى يزعل.
أه ممكن ازعل كجمهور الاهلى، برضة لان الراجل بدون ما يقصد فرقع بالونة بتضايق ناس كتير، وكشف حقايق داخلية لكن من منظور خارجى، وعرفنا اننا مكشوفين أوى، وحاول يفوق ناس كتير من الاوهام اللى عايشين فيها.
هجمة شنيعة من الامس على الرجل لمجرد أنه قال الحقيقة، لان دايماً الحقيقة بتزعل.
