اقترح الناقد الرياضى خالد طلعت اقتراح على المستشار مرتضى منصور، وعلى محمود الخطيب رئيس النادى الاهلى.
هذا الاقتراح نراه غير قابل للتنفيذ على أرض الواقع، لمواجهة سيطرة المغرب على الاتحاد الافريقى، وبالتالى الظلم الذى نراه على الاندية المصرية فى بعض الامور.
وعبر صفحته الشخصية على موقع التواصل الاجتماعى فيس بوك كتب خالد طلعت مقترحاً :
أنا عندي اقتراح يا رب يتدرس ويتنفذ
كلنا شفنا ان الكاف في الفترة الأخيرة بدأ ينحاز لمنتخبات وأندية المغرب في البطولات الأفريقية بشكل فج، سواء في القرارات التنفيذية (زي ان الاهلي يلاعب الوداد السنه اللي فاتت النهائي ماتش واحد في المغرب ، وبيراميدز لعب مع نهضة بركان نهائي الكونفيدرالية ماتش واحد في المغرب برضه) ، أو في القرارات التحكيمية اللي بتكون معظمها لصالح الفرق المغربية وفيها مجاملة ليهم وظلم للفرق المصرية وده ظهر في ماتش الأهلي والوداد الاخير ، وماتش الوداد وصن داونز كمان قبله ، وماتشات تانية كتير
انا شايف ان كابتن محمود الخطيب والمستشار مرتضى منصور لازم يقللوا المشاكل اللي بين الطرفين ويهدوا ويحطوا ايديهم في ايد بعض لصالح الفرق المصرية والكرة المصرية ، لأن طول ما هما فيه بينهم وبين بعض مشاحنات وخناقات ومشاكل وقضايا ده مش في صالح الناديين لأن دايما الاتحاد قوة
أنا شايف ان لازم تكون فيه وقفة موحدة من كل الأندية المصرية الكبيرة اللي بتشارك في بطولات أفريقيا (الأهلي والزمالك وفيوتشر وبيراميدز) ومعاهم كمان اتحاد الكرة المصري ، ويحصل اتفاق بين الخمس اطراف دول ويتبعت خطاب رسمي للاتحاد الافريقي من اتحاد المصري بمشاركة الـ4 اندية ويتقال فيه ان فيه شعور بالظلم ومجاملة الفرق المغربية في الفترة الاخيرة ، ويتحط فيه كل المواقف والاحداث والحالات التحكيمية في أخر كام سنة بالتفاصيل
ويتحط تهديد رسمي انه في حالة حدوث اي اخطاء تحكيمية في ماتش العودة بين الاهلي والوداد هيصدر قرار رسمي بعدم مشاركة كل الفرق المصرية في البطولات الافريقية لمدة سنتين او تلاته ، ونكتفي بالمشاركة في البطولة العربية ، وكمان ممكن احنا نستحدث بطولة في مصر ونجيب فرق كبيرة عربية وافريقية ويبقى فيه شركة راعية ونحطلها مكافأت كبيرة ونقل تلفزيوني تدخل دخل مادي كبير لينا وننافس بيها بطولات افريقيا
أعتقد تهديد زي ده هيخوف ويقلق الاتحاد الأفريقي والشركات الراعية وبي ان سبورت الناقلة للمباريات ، لأن عدم مشاركة الفرق المصرية هيسبب خساير مادية رهيبة جدا للكاف ولكل الشركات الراعية، وهيوصل رسالة قوية للفيفا ان فيه فساد في الكاف
