علق المحلل الرياضى عماد دربالة على الوضع الحالى داخل نادى الزمالك، فى ظل ما يتم الحديث به عن المؤامرة على النادى.
وعبر صفحته الشخصية على موقع التواصل الاجتماعى فيس بوك كتب عماد دربالة قائلاً :
مبروك لجمهور الأهلى انتصارات ناديهم.الانتصارات مش كؤوس وانما انجازات واستقرار وفروع ورعاه وهدوووووء.
كلامى مش معناه حب للأهلى وانما إعجاب بنجاحه ومنظومته ومازلت حزين لاتساع الفارق بين عشق حياتى الزمالك والأهلى.
اللهم ارزق نادينا من يصلحه ويأخذ بيده من الظلام للنور و اعتذر عن اى اساءه او استفزاز او سوء فهم صدر منى فى حق النادى اللى رافع راس مصر والاهلاويه.
المؤامره مش هى اللى عينت اهلاويه فى قناة الزمالك.
المؤامره مش هى السبب فى تحقيق جوزيه 28 فوز علينا معظمهم بحكام اجانب.
المؤامره مش هى السبب فى رحيل ساسي وبن شرقى ومصطفى فتحى عشان الفلوس وجبنا سامسون ورفاقه بمقابل اعلى منهم.
المؤامره مش هى السبب فى منع رموز النادى من الدخول وتحويلهم لاعداء.المؤامره مش هى السبب فى قضايا كتير وحل المجلس كل يوم.
المؤامره مش هى السبب فى انهيار فريق اليد ولا ان الاهلى تخطانا فى بطولات الطايره.
المشاكل احنا سببها ولازم ندور عليها ونصلحها والا هنفضل تحت طول عمرنا ومتغميين مش شايفين الحقيقه.
لو حضرتك شايفنى مرتشى وبعت نفسي وان المؤامره سبب كل المشاكل ما تكلفش نفسك وتعمل تعليق مستفز وارزعنى بلوك وريح دماغك.فوقوا الله يهديكوا الأهلى لو قفل ابوابه 30 سنه مش هنحصله.الأهلى مش نادى محظوظ ده مش حظ ده توفيق من ربنا ييبعته للمجتهد اللى يستاهله.اللهم بلغت اللهم فاشهد
زمالكاوى جدا وافتخر واقسم بالله ما بحب الاهلى ولا حد ادانى فلوس ولا حد وعدنى بحاجه
