علق المستشار محمد عطية عضو اللجنة السابقة التى كانت تدير نادى الزمالك على ما يدور الان فى السوشيال ميديا الزملكاوية والحديث عن أهداف عضو الجمعية العموميه فى الزمالك ومشجع الزمالك.
حيث يرى البعض أن هناك تناقض واضح بين أهداف هذا وذاك، وهناك حملة دائماً ما تُشن على اعضاء الجمعية العمومية فى الزمالك، ليتحدث محمد عطية عن هذا الامر من وجهة نظره.
وعبر صفحته الشخصية على موقع التواصل الاجتماعى تويتر كتب المستشار محمد عطية قائلاً :
الحقيقة فى جزء من الجمهور بيتعامل بلهجة استعلائية شديدة مع أعضاء الجمعية العمومية للنادى وأحياناً بتصل لإنها تكون طريقة مُهينة ..
ببساطة ومنطقية وواقعية أهداف المُشجع من أى إدارة لا تتطابق مع أهداف عضو الجمعية العمومية بطريق اللزوم .. مش مطلوب منه ينصاع لرغبتك فى مرشح بعينه لمجرد إنك عايزه .. المطلوب إن المرشح يكون عارف إنه مطالب بأهداف جمهور وأهداف أعضاء ويشتغل على الإتنين ..
ويبقى عارف المرشح إن شرعيته من الجمعية العمومية وقوته وديمومته فى منصبه من الجمهور .. وكجمهور مطلوب منك وانت بتطالب بأهدافك تلزم مرشحك بأهداف الناخبين وتخاطب الناخبين وتوضح لهم الصورة وتساعدهم فى اختيارهم وحتى لو ضغط عليهم يكون بلا استعلاء أو إهانة ..
لإنك وانت بتعمل كدة ثق إن فى back fire هيحصل للمرشح بتاعك وانت بالتبعية .. العند يا عزيزى من محاولة الاستعلاء والثأر من الإهانة هيخلو الناخبين يرفضوا المرشح بتاعك ويصوتوا ضده تصويت عقابى لك انت ..
ليس هكذا تدار الأمور لازم كمشجع تقتنع انك بتتفرج على الماتش مش بتلعبه واللى بيلعبوه لازم يقتنعوا بكلامك مش يتفرض عليهم
