وجه المستشار محمد عطية عضو اللجنة السابقة التي كانت تدير نادي الزمالك رسالة قوية الى مجلس الادارة الحالي، تخص معتمد جمال وبعض الوعود
المستشار محمد عطية عبر حسابه على موقع التواصل الاجتماعي فيسبوك علق قائلا:
أولا: الحمد لله على الفوز
ثانياً: اللى هكتبه فى التويتة لو مش عاجبك تجاهله وما تعلقش عشان ده اكونتى الشخصى
ثالثاً: الحقيقة اللى بيحصل ده غلط .. كامل الاحترام لكابتن معتمد لكن الزمالك لازم له مدير فنى أجنبى ويكون عنده خبرات ادارة مباريات من منصب الرجل الأول وده بند كان معلوم للادارة وبيدفع راتبه (الادارة وقت الترشح نفسها دفعت راتبه) .. مش بند جديد ينفع يتحط تحت مُبرر مكنوش يعرفوا
رابعاً: الوعود الثابتة اللى اتقالت مفيش مُبررات لعدم تنفيذها لإنها كانت معروفة من الأول ومحدش تفاجئ بها ومحدش طلب منهم وعود مش هيقدروا ينفذوها .. وطبعاً جملة الوعود الانتخابية محدش بيتحاسب عليها هى قمة العبث والجهل لإن ده فقدان للمصداقية ودى بداية الخراب
خامساً: ملف ألعاب الصالات مفيش فيه حاجة بتم صح ومنتهى التباطئ فى الحل
سادساً: فكرة صعوبة التركة مفيهاش جدال لكن مش مُبرر لكل حاجة وجود مجموعة بتبرر الغلط أكثر ضرراً على الزمالك وعلى الادارة من أى حاجة تانية لإنك بترفع عنهم الضغوطات وبتحضر لهم شماعة جاهزة يستخدموها هما نفسهم - فى وجهة نظرى - مش عايزين يستخدموها ولا فكروا فيها
سابعاً: المجلس ده دعمناه وهنفضل ندعمه بس لازم وقت الغلط نقول عشان هما يرجعوا خطوة لورا وعشان الاهم ان نجاحهم مهم جداً للزمالك ولينا .. لكن التبرير والتمصدر هيضرهم اكتر
ثامناً: فك القيد والتدعيم الممكن مش رفاهية ده التزام - واحسبهم هينفذوه - اتمنى محدش من الادارة أو الجمهور يسمح بإنه ما يحصلش لإن عواقب عدم تنفيذه هتطال الكل
تاسعاً: الاصلاح وانت بتكسب والنقد بلا غرض افيد من محاولة التغافل عن الاخطاء
عاشراً: راجع البند ثانياً
