رد الناقد الرياضي خالد طلعت عن غضب بعض من جماهير الأهلي من قرار تأجيل مباراة الزمالك وبلدية المحلة في الدوري
وكانت رابطة الأندية قد قررت بالأمس تأجيل مباراة الزمالك وبلدية المحلة التي كان مقرر لها يوم 3 أبريل بسبب ضيق الوقت وتواجدها بين مباراتي ربع نهائي كأس الكونفدرالية
خالد طلعت وعبر حسابه على موقع التواصل الاجتماعي فيسبوك تحدث قائلا:
الأهلاوية اللي طالعين يقولوت ليه الزمالك اتأجله ماتش البلدية وانه المفروض ميتأجلوش ماتشات ويلعب عادي لأنه مش مضغوط زي الأهلي
وكمان بيتريقوا على الزمالك وبيقولوا انه نادي (اشمعنى) وبيطلب التأجيل عشان الأهلي بيتأجله ماتشات
حيث تحدث أولا أول عنصر في مبدأ تكافؤ الفرص في أي بطولة دوري في العالم كله ان الفرق كلها تكون لاعبه ماتشات قد بعض ، أو لو فيه ظروف استثنائية يبقى فريق متأجله ماتش واحد بس أو اتنين ، مش فريق لعب 8 ماتشات من 17 ماتش ومتأجله 9 ماتشات كاملة عشان لازم كل الفرق تلعب في نفس الظروف ليهم أو للمنافسين بتوعهم في الماتشات.
وتابع: ثانيا وده الأهم بقى ان الأهلي نفسه ليه موقفين مشابهين للموقف ده بالظبط دول مشابهين كمان دول أسوأ مليوووون مرة
الموقف الأولاني في مارس 2017 في عهد محمود طاهر، اتحاد الكرة أجل للزمالك ماتش واحد بس بتاع طلائع الجيش عشان الزمالك كان عنده ماتش أفريقي مهم بعدها بـ 5 أيام ، والأهلي (اتقمص) ونزل بيان رسمي وبعت جواب رسمي لاتحاد الكرة انه مش هيلعب اي ماتش في الدوري غير لما الزمالك يلعب مؤجلاته ، وكان مؤجل للزمالك (ماتش واحد فقط لا غير) يا مؤمن مش 9 ماتشات !!!!
وواصل: الموقف التاني في أكتوبر 2019 في عهد محمود الخطيب ، اتحاد الكرة أجل ماتش واحد بس للأهلي والزمالك مع بعض ماتش القمة ، وكان لظروف خارجه عن ارادة الجميع لدواعي أمنية بعد لما الأمن رفض اقامة اللقاء ، والأهلي برضه (قفش) ساعتها ورفض انه يلعب الماتش اللي بعده ماتش الجونة ولا أي ماتش تاني في الدوري غير لما ماتش القمة المؤجل يتلعب الأول ، والأهلي قعد شهر كامل (مقموص وقافش) ومرضيش يلعب في الدوري بسبب الأزمة دي !!
واختتم وطبعا كل الاعلاميين والجماهير الاهلاوية اللي بيتريقوا على الزمالك دلوقتي وبيقوله انه نادي اشمعنى ، وانه مش من حقه يطلب تأجيل ماتشاته كانوا واقفين مع مجلس ادارة الأهلي في الموقفين السابقين وبيقولوا انه عندهم حق تحقيقا لمبدأ تكافؤ الفرص
استقيموا يرحمكم الله
الناقد الرياضي خالد طلعت استدل على كلامه بأخبار سابقة تؤكد ما قاله في تصريحاته وتؤكد مطالب الأهلي السابقة بالتأجيل على غرار الزمالك أيضا رفض الأهلي خوض مبارياته إلا بخوض الزمالك مبارياته المؤجلة
