علق الاعلامي والكاتب الصحفي محمد الجبالي على الجدل الأخير بشأن تسريب تشكيل الزمالك قبل مواجهة اليوم أمام فريق فيوتشر
وذلك في ذهاب ربع نهائي الكونفدرالية الأفريقية التي تقام اليوم على ملعب استاد السلام.
حيث خرج جدل أخير بشأن ازمة تسريب التشكيل واتهامات للاعب سيد نيمار، قبل الخروج من داخل الزمالك والدفاع عنه ونفي هذا الاتهام عنه.
محمد الجبالي وعبر حسابه على موقع التواصل الاجتماعي تويتر تحدث قائلا:
كلمتين من جوا قلبي قبل ساعات قليلة من مباراة الزمالك وفيوتشر في الكونفدرالية .. الحق يقال .. أخر 10 أيام اتبذل مجهود خرافي ( غير معلن ) بمعني الكلمة من مجلس الإدارة وجهاز الكرة للم شمل الفريق من الداخل لتوفير الأجواء المناسبة للفريق للفوز بالمباراتين
وتابع: رغم كل الشائعات التي تثار يوميا .. ولما بقول مجهود خرافي غير معلن أنا مدرك فعلا معني الجملة .
** أخر اطمئنان على الفريق اتقال ليا والله العظيم بالنص :" لو الفريق لعب نص الأداء اللي شايفينوه في التمرين هنفوز أقل حاجة 3 - 0 بس المهم الجماهير تقف ورانا وتبعد عن الشائعات دي
وواصل: أنا كنت عارف تقريبا ملامح مين اللي هيتم استبعادهم من القائمة وكنت عارف كمان إنها لأسباب فنية بحته ووفقا لتكتيك فني سيعتمد عليه المدير الفني جوميز في مباراة الغد أمام فيوتشر ... ومفيش أي حاجة بخصوص موضوع تسريب التشكيل بخصوص اللاعب نيمار ،، وأنا واثق في صحة الكلام ده ..
واستكمل: عارفين ليه ؟ علشان تسريب التشكيل عرض مستمر من سنوات طويلة مش اليومين دول ( وللأسف منك فيك ) ... وعلى فكرة الفترة اللي كان ماسك فيها أمير مرتضى وبيديرها بالحديد والنار كان التشكيل بيتسرب برضوه ( على فكرة أنا كنت من المؤيدين جدا للطريقة اللي كان بيتعامل بيها أمير مع الاعلام الداخلي والخارجي وقت ما كان مسئول عن الفريق وعموما أنا عشت موضوع تسريب التشكيل ده لما كنت مسئول في المنظومة الاعلامية أيام لجنتي اللواء عماد عبد العزيز والكابتن حسين لبيب والحمد لله رب العالمين وكل الزملاء الصحفيين يشهدوا إنه مكنش بيحصل وقتها لأن حله بسيط وسحري وقولتوه مليون مره
واستكمل تصريحاته: بس محدش بيسمع الكلام واسألوا الكابتن أسامة نبيه لما كان ماسك مع كارتيرون وقتها عملنا ايه علشان نمنعه تماما .. ويكفي اني اقولكم كان التشكيل الرسمي بيجيلي أول واحد والمكان اللي أنا شغال فيه كان بياخدوه من الموقع الرسمي لما ينزل، لأن دي أمانه وخيانة الأمانة عقابها عند ربنا كبير …!
وواصل: ياريت جمهور الزمالك يفكر بعقله شوية الفترة دي ويحلل اللي بيحصل كل يوم بشكل عقلاني ... وقتها هيرتاح جدا ... للأسف فيه ناس كتير من جماهير الزمالك بالعاطفة بتساعد على انتشار مثل هذه الشائعات .
واختتم: على ما أعتقد إن جوميز سيفاجئنا بطريقة لعب وتشكيل مناسبة جدا للمباراة ويبقى التوفيق في النهاية والتركيز في الملعب والتعامل مع فيوتشر على أنه فريق قوي لا يستهان به أنا واحد من الناس اللي متفائل جدا بأن الزمالك سيحصد الكونفدرالية السنة دي لتكون البطولة القارية الثانية بعد بطولة 2019
