حرص الإعلامي إبراهيم عبد الجواد على تشبيه وضع نادي الزمالك حالياً في ظل عمل مجلس إدارة النادي الحالي برئاسة حسين لبيب.
خاصة في ظل الانتقادات التي تواجه مجلس الإدارة من حين لآخر خاصه من الجماهير التي تطالب بتحسن سريع لأحوال الفريق والفرق الجماعية.
ابراهيم عبد الجواد وعبر حسابه على موقع التواصل الاجتماعي فيسبوك تحدث قائلاً نصا:
وضع الزمالك الحالي عامل بالظبط زي المهندس اللي داخل يشطب بيت كبير و دخل لقي السباكة ضاربة والكهرباء بايظة والحيطان ناشعة وكل حاجة رايحة في داهية .. طبيعي هيبتدي بالأساسيات وياخد وقت عقبال ما يفكر في الفرش .. وطبيعي برضه صاحب البيت هيكون مستعجل علي ميعاد التسليم ..
وتابع: بس من الظلم ان صاحب البيت يتخانق من المهندس ده انه مركبش نجفة كريستال في الوقت اللي المهندس مش لاقي سلك كهربا ينور به اصلاً عشان يدخل يشتغل .. ده غير ان المهندس كل شوية يخبط عليه محضر ولا مأمور ضرايب ولا حد من الديانة عشان يدفع فلوس عشان يعرف يكمل شغل يا إما يفصلوا الكهربا والمياه من العمومي .. الزمالك في ظروف شديدة الصعوبة و أثق ان مجلس ك/ حسين لبيب قادر تماماً علي حل كل هذه المشكلات لكنه في احتياج الي مزيد من الوقت و دعم من جمهور الزمالك الواعي
