علق شريف إكرامى حارس مرمى نادى بيراميدز على ظروف وفاة احمد رفعت لاعب نادى فيوتشر بالامس.
الوفاة التى جاءت بصورة مفاجئه، بعدما قيل أن اللاعب تتحسن حالته الصحية، حرص شريف اكرامى التعليق على هذا الامر.
وعبر صفحته الشخصية على موقع التواصل الاجتماعى إكس كتب شريف إكرامى قائلاً :
احمد رفعت مات بس كريستيان اريكسن عاش..
مات مع ان اللي عالجوه طلعوا كل يوم في البرامج يتكلموا ويطمنو الناس عليه ،و يأكدوا لنا ان محدش قصر..
رفعت مات مع ان الوزير راح بنفسه واطمن عليه واتصور معاه كمان عشان يطمنا اكتر..
مات بعد تاكيد مسئولي ناديه انه في طريقة للعودة للملاعب وأنهم عملوا معاه الواجب و زياده..
طبعاً لكل اجل كتاب اللهم لا اعتراض ..
بس بردو لكل اجل سبب..
اريكسين عاش عشان اتلحق من اول ثانية قلبه فيها وقف..مش بعد نص ساعه..
اريكسن عاش عشان فيه قدسية لحياة الانسان و صحته..مش بنتاجر بيها..
عاش عشان في ناس بتشتغل بجد..ناس مسئولة عندها ضمير واحترام لنفسها ولمناصبها،مش ناس كل همها تبان كده..
اريكسن عاش لان في ناس اشتغلت علي كل حاجه عشان تنقذ حياة بني ادم..مش اشتغلت بس عشان تخلي مسئوليتها..
اريكسن عاش عشان محدش قهره نفسياً ولا ذله و لا اتحكم فيه و لا فمستقبله..
روح يا رفعت للي ارحم من اي حد..
روح عشان حق اللي بيموت هنا يابني كام صورة علي شوية تغريدات،و دمعتين في البرامج و اخرهم يومين تلاته..وبس
ارتاح يابني و سيبنا هنا مع الافاقين و المتاجرين معدومي الاحترام و الضمير و الانسانيه..
ارتاح يا رفعت لعل و عسي موتك يكون سبب في صحيان ضمائر و ذمم ماتت من زمن..
رحمك الله يا احمد
