رد الكاتب الصحفي عمرو الدردير على الانتقادات التي توجه مؤخرا الى البرتغالي جوزيه جوميز المدير الفني للفريق الأول لكرة القدم بنادي الزمالك
الانتقادات الأخيرة بسبب سياسة جوميز الأخيرة بالدفع بالناشئين بكثافة تنال العديد من الانتقادات الفنية خاصة وأنه تسبب فقدان المزيد من النقاط في الدوري
عمرو الدردير دافع بقوة عن سياسة جوميز من أجل رؤية كافة الناشئين والاستفادة بهم وبناء فريق قوي خلال الموسم المقبل
حيث كتب عمرو الدردير عبر حسابه على موقع التواصل الاجتماعي فيسبوك قائلا:
هل الزمالك محتاج حاجه من الدوري ؟! لا
هل هيفرق مركز تالت من رابع من خامس ؟! لا ، جميع المراكز لا قيمه لها بالنسبه للزمالك بعيدا عن حصد اللقب .
اولا .. الدوري المصري متلاحم ومتزاحم من اربع مواسم والفريق مبيعملش فترات اعداد ولا بياخد راحه كافيه وبالتالي لو كملت الموسم بالفريق الاول هتدخل الموسم الجديد بلاعيبه مرهقه وغير مستعده ولا جاهزه لخوض موسم نطمح ان يكون افضل علي مستوي الاداء وحصد البطولات ..
ثانيا .. احنا بنلعب حاليا كل يومين وكل 3 ايام مباراة ومفيش في الزمالك الإسكواد اللي يساعد انك تلعب بتشكيل اساسي وثابت .
ثالثا .. الفريق اكتر من النصف غايب وكلهم لاعبين من القوام الاساسي سواء غياب للاصابه او اللي منضمين للمنتخب الاوليمبي ، يعني عندك " زيزو - حسام - زياد - شحاته " في باريس وعندك " فتوح - الجزيري - شيكابالا - احمد حمدي - الزناري " مصابين .
9 لاعبين من القوام الاساسي واللي جوميز بيعتمد عليهم بشكل كامل غير موجودين ، على اي أساس بيتم انتقاد المدرب علي اختياراته للتشكيل او القائمه و بيتم اللوم عليه علي النتائج .
هو متاح معاه عدد من الناشئين بيلعب بيهم في المباريات اللي بيكون فيها الخصم متواضع زي البلديه ولازم برضه الكام ناشئ دول يلعبوا في احتكاكات رسميه لانهم هما غالبا اللي مكملين بعد الاتغناء عن فرقه 2003 و 2004
يبقي اللاعيبه اللي لعبت دي جزء منهم هيكمل في قايمه الموسم الجديد علي حسب رؤيه جوميز والجزء الباقي هيرحل للبيع او الاعاره .
اللي بيعمله جوميز صح جدا وكنت اتمني انه يحصل من بعد قرار عدم لعب مباراه القمه ، لازم اللاعيبه الاساسيه تستريح وتاخد فتره راحه عشان نبدأ الموسم الجديد بشكل صحيح بفتره اعداد للفريق ومعسكر خارجي مغلق ..
اتمني نسيب الجهاز الفني يشتغل لانهم اقرب و ادري حد بالوضع الحالي للفريق .
