الزمالك .. هو العشق الأول لجماهيره ومحبيه، مهما كانت الظروف على ومهما كان الوضع يظل الزمالك ملك جماهيره فقط.
جمهور الزمالك والعبارة الشهيرة، احنا بنشجع الزمالك علشان يكسب، مش علشان بيكسب، ودا سر بقائه رغم كل المؤامرات اللى بتتم حوله.
بالطبع الترند الان هو زيزو، وانتقاله لـ الاهلى، لأننا لا ننظر الى الامور بسطحية، ونبحث عن مصلحة الزمالك بصفة عامة، دعونا نتحدث معكم بنوع من الفضفضة، حتى لو تعرضنا لهجوم.
فى البداية نحن وصلنا الى هذا الوضع فى ملف زيزو، لان الوضع فى الزمالك صعب وغير مستقر، نتيجة تركة سابقة للمجلس السابق، وسوء ادارة واضح للمجلس الحالى.
من غير المعقول أن الزمالك لديه 3 رؤساء يتحكمون فى النادى، وأقلهم تحكم هو مجلس الادارة الحالى، ومش عايزين حد يزعل.
ممدوح عباس فى تحكم غير مقبول فى كل ما يخص النادى، حتى لو كان بيدعم،، ميدو وبرضه بيتكلم كأنه رئيس النادى وللاسف مشوفناش نتيجة في النهاية، واخيراً المجلس الموجود برئاسة الكابتن حسين لبيب، مع كل الاحترام والتقدير.
عمر الامور ما تمشى كدا، والبدايات الغلط لازم توصل لـ نهايات غلط، ودا اللى احنا فيه.
مجلس الادارة رفض بيع زيزو من كام شهر بـ 6 مليون دولار، كانت قابلة للزيادة وقت التفاوض، ودا قرار من أصعب القرارات اللى تم اتخاذها، بحجة انه لاعب جماهيري.
بالمناسبة مفيش حاجه اسمها لاعب جماهيري، وقولنا الزمالك لو عايز يقف على رجله لعقود، لازم يحط مبدأ نمشى عليه ولا نقبل "لى ذراع من اى لاعب".
بالضبط زى واقعة الـ 3 لاعبين اللى خرجوا للسهر ليلة مباراة مهمة، وطالبنا هنا انهم يمشوا تنفيذاً للمبادئ، وبالفعل صدر قرار بعرضهم للبيع، ثم تم التراجع .. يبقى منتظرين ايه.
الزمالك يا سادة يفتقد للنظام، وبالمناسبة النظام مش محتاج فلوس ولا له علاقة بـ أزمة مالية، له علاقة بالإدارة .. ومن هنا لازم تكون البداية..
زيزو قصة وانتهت .. حتى لو رجع وقال أجدد انا اللى أقوله لا والف لا .. لازم نبدأ نشوف الفترة الجاية، مجلس ادارة قوى .. ميخفش من الجمهور، ممنوع أى حد يتدخل حتى لو بيدعم النادى مالياً، ممنوع حد يتصور أنه هو الإدارة، وفى الاخر انا أسف مشوفناش حاجة يعنى وهنا أقصد لجنة التخطيط، برضة الامور سمك لبن تمر هندى.
لازم نظام .. لازم سيستم .. وهنفضل نطالب بـ النظام والسيستم مهما إتهاجمنا ، الزمالك مش لاعب ولا فرد ولا مجلس إدارة .. الزمالك كيان كبير.
