يمر نادي الزمالك الان بفترة عصيبة فى تاريخه، نتيجة عوامل داخلية وخارجية كثيرة.
وسواء غياب العدالة عن المنظومة الكروية، الى جانب "العك" الموجود لدينا، كل هذا اوصل النادى الى ما هو فيه الآن، فى وضع محزن للجماهير..
للتذكرة فقط، لعل الذكرى تنفع المؤمنين، الزمالك اليوم أول من طالب هنا ببيع أحمد سيد زيزو عندما وصل عرض سعودى بـ 6 مليون دولار، كانت قابلة للزيادة لـ 8 او 9 مليون وقتها، وإتهاجمنا.
أول من قال المبلغ دا هو اللى هيحل به النادى الازمات الخارجية تحديداً كلها، ونقفل الملف دا ويبقى دا الجميل اللى تعمله الادارة الحالية للنادي.
إحنا اللى قولنا مفيش حاجة إسمها لاعب جماهيري، ومفيش حد أكبر من الزمالك لا لاعب ولا مسؤول ولا مدرب ولا رئيس نادى، الزمالك وبس، وإتهاجمنا.
احنا اللى طالبنا بتطبيق قرار النادى بعرض الثلاثى صاحب واقعة السهر ليلة المباراة، وعدم التراجع عن القرار، لفرض سياسة الانضباط فى الفريق، وإتهاجمنا.
احنا اللى قولنا بلاش تدخل السيد ممدوح عباس رئيس النادى السابق بهذه الطريقة، الزمالك كيان كبير، من المفترض تتم إدارته بمعرفة المجلس وبس، والداعمين مش من حقهم يتكلموا بلسان النادى.. وإتهاجمنا وإتقال لنا الراجل بيدفع.
إحنا اللى قولنا الزمالك كبير اوى ولا يجب ان يقوم اى لاعب أو اى شخص بـ "لي ذراع النادى" مهما كان هو مين.
إحنا اللى قولنا الزمالك عايز متحدث إعلامى قوى يرد على الكلام الفارغ والشائعات التي تطال النادى ويطلع مع الجميع ويرد بقوة، مع كامل الاحترام للاستاذ احمد سالم، وإتهاجمنا.
إحنا اللى طالبنا بعمل مؤسسي حقيقى فى النادى "بعيد عن التصريحات اللى إتقالت" وقولنا لجان تدير النادى لجنة فنية، لجنة اعلامية، لجنة انشاءات، لجنة علاقات عامة، لجنة مالية، لجنة تطوير للموارد وأفكار خارج الصندوق، وما الى ذلك وشرحنا كل دا ويبقى دور المجلس الإشراف والمتابعة، بحيث اى حاجة تحصل النادى ماشى فى طريقه ولا يتأثر.
احنا اللى طالبنا بتطوير قناة الزمالك علشان تبقى منبر يرد عن اى حاجة ضد النادى، ويبقى حائط صد، والناس زعلت وهاجمتنا
احنا اللى قولنا النظام والسيستم دا اللى محتاجة الزمالك، وده مالوش علاقة بالأزمة المالية، واتهاجمنا برضة.. وأخيرا سنظل نتحدث بما فيه مصلحة الزمالك مهما كان الهجوم.
اخيراً سيبقى الزمالك مهما حدث، رغم كل محاولات الهدم، لان الزمالك دا حاجة كبيرة أوى.
