خرج الإعلامي عمرو نصوحي مقدم برنامج "كابيتانو مصر" الشهير" برسالة ردا على قرار اللاعب أحمد السيد زيزو لاعب الزمالك الانتقال إلى النادي الأهلي
وكانت الفترات الأخيرة قد شهدت أنباء مؤكدة عن انتقال اللاعب أحمد السيد زيزو لاعب الزمالك للنادي الأهلي.
وكتب عمرو نصوحي عبر حسابه على موقع التواصل الاجتماعي اكس قائلا:
اول ما قريت بوست زيزو من يومين اقتنعت وصدقت كلامه لانه الحاجة الوحيدة المنطقية، كلام متناسق مع كل اللي قاله قبل كدة واخره في فيبراير مع إسعاد يونس ومختصره الزمالك اولا وجمهور الزمالك قبل اي حاجة وهما اللي عملوني…
أنا مش قادر اتخيل اي حد بيتفق على مرتب السنة في الشغل واجي في الاخر ألاقي نفسي واخد اقل ومش بقبض ٣-٤ شهور زي ما بنسمع.. حاجة تخلي الواحد يطفش من المكان اللي بيحبه ويمشي.. ولو جامد العالم الكله هيبقا عايزه وعارض عليه أضعاف الفلوس… والكلام ده احنا كجمهور مش بنحس بيه لاننا عمرنا ما هنعرف نحط نفسنا مكانه بكل المغريات دي..
بس انت بردو عارف وشفت ان لما الجمهور بيقف في ظهرك بيخلي حتى الادارة اللي فشلت تماماً في كل ما سبق وزيادة تجيلك وتديك كل اللي انت عايزه..
فلما تيجي بقا اللحظة اللي تقرر تمشي فيها عشان مابقتش قادر تستحمل والعروض كثير وتبقا عايز تدي لنفسك حقها عليك.. فتقرر تروح الاهلي وتكذب يبقا كل الهري اللي فوق ده مالوش اي ثلاثين لازمة ولا يخصني ولا يهمني ولا تعرف تشتري بيه مني بثلاثة تعريفة تعاطف.. ده انت طلعت ماضي وكل مصر عارفة وبتحور على الناس الوحيدة اللي صدقتك..؟! قاعد بتغني معاهم في المدرج وانت موقع ومخلص وطالع تقولي بعد الجول "you can’t see me" .. ده ايه الجبروت ده.. انت مين ؟!
والعيب عمره ما بيبقا على اللي صَدَّق..ال عيب بيبقا على اللي بيكذب
الحركة دي بالنسبة ليه تعدي ليفل فيجو لما راح مدريد من برشلونة وتعدي اي حد راح الاهلي من عندنا قبل كدة بما فيهم امام بكثير..
ده مش اول ولا آخر لعيب يسيبنا ويروح الاهلي بس احنا كنا فعلاً فاكرينك مختلف… وحطيناك جنب اسامي كبيرة اوي في قلوبنا وبيوتنا وانت عارف.. بس على قد مقدار الحب على قد مقدار الاحساس بالقرف.
جون سينا بتاعك بقا الvillain الأكبر بس ده شو مش حقيقة..
واختتم: يلا بالف سلامة.. ولا حتى من غيرها احسن بردو.. رصيدك معايا كزملكاوي تحت الزيرو
