وجة ناصر ماهر نجم الفريق الاول الكروى فى النادى، الذى انتقل حديثاً بالميركاتو الشتوى الحالى الى بيراميدز، رساله لجمهور الزمالك.
ونشر عبر حسابه الرسمى على موقع التواصل الاجتماعى "انستجرام":
وكتب: مش عارف أبدأ منين، لأن في حاجات مش سهلة تتقال خصوصًا لما تكون بتتكلم لجمهور عظيم زي جماهير الزمالك داخل القارة وخارجها.. اسمحولي أعبر عن حبي واحترامي ليكم… والله مش مجرد كلام، من أول يوم دخلت فيه النادي وأنا حاسس إن المكان ده فيه حاجة تتحب، يمكن عشان ده كيان كبير، أو عشان لاعبين كبار وشخصيات محترمة بتتحمل أكتر من أي حد، أو عشان الجمهور المختلف بأجواءه ودعمه ومتعته، بس في الآخر الكرة ممكن تخليك تسيب مكان بتحبه، وده جزء من اللعبة أنا بحبكم جدًا والله.. النهارده آخر يوم ليا في نادي الزمالك، النادي اللي تشرفت إني ألبس التيشيرت التاريخي بتاعه، ودافعت عنه بكل إخلاص وحب، أنتم خلتوني نجم بجد، ودايمًا بقول إن ربنا أكرمني بجمهور الزمالك، يمكن الرحلة خلصت دلوقتي بسبب ظروف النادي الصعبة، وأتمنى أكون جزء ولو بسيط في حل الأزمة المالية، وأقدر أساعد النادي لأن الزمالك كبير ويستحق إن الواحد يضحي عشانه.. وبالنسبة لي، الرحلة لسه فيها فصل تاني إمتى؟ الله أعلم، وبشكر كل زملائي اللاعبين الرجالة بجد في كل المواقف، وبشكر إدارة نادي الزمالك برئاسة الكابتن حسين لبيب، وبشكر جميع المدربين اللي تدربت معاهم.. شكرا كابتن جون إدوارد، شكرًا كابتن عبد الناصر محمد، وشكرًا كابتن أحمد سليمان اللي خلاني أكون متواجد داخل نادي الزمالك، وكمان بشكر الأوفياء، جمهور الزمالك العظيم، الداعم الأول للنادي، آخر حاجة هقولها، أنا دخلت النادي وقلت أنا بحب الزمالك، ودلوقتي وأنا ماشي بقول: هفضل أحب الزمالك.
