تغنى الاعلامى خالد الغندور بجمهورى الزمالك والاهلى لما قدموه من دعم كامل لفريقهم على مدار هذا الموسم.
ونشر عبر صفحته الرسميه على موقع التواصل الاجتماعى "فيس بوك":
وكتب: يا زمالك العب
العب واكسب
راجل على طول
جوا الملعب....
التالتة شمال
بتهز جبال
وبأعلى صوت راح نشجع الأبطال
فريق كبير
فربق عظيم
أديله عمري وبرضه قليل
برا جدول ترتيب الدوري الرسمي
اللي لسه بطله ما اتحددش بشكل نهائي
عندنا بطل الموسم ده
البطل ده هو الجمهور
الجمهور اللي ما بقاش اللاعب رقم ١٢
لاااا
دا اللاعب رقم واحد
معلش
وبحكم ترتيب الجدول
هبدأ بجمهور الزمالك
الصابر المحترم
جمهور الزمالك معروف تاريخه وصموده
الجمهور ده .. هو حارس هوية الزمالك الحقيقي
الموسم اللي فات
انتهى نهاية درامية
خسارة الكونفيدرالية
خسارة الدوري
رحيل أهم نجوم الفريق وللمنافس
أزمات مالية طاحنة
فطبيعي إن الموسم هيكون صعب ومستحيل
جمهور الزمالك وقف في ضهر فريقه رغم البداية الغامضة
وضبابية المشهد
تجربة جديدة لچون إدوارد
لاعبين مع كل الاحترام معظمهم مش نجوم
مدرب يانيك فيريرا ما كانش معروف ولا أداؤه مرضي
ومع كدا
الجمهور صبر
ووقف بكل رجولة في ضهر الفريق
ودعم أحمد عبد الرؤوف في تجربته
والأرض انسحبت
وإيقافات القيد نازلة زي المطر
واضطر النادي يبيع دونجا وناصر ماهر
واتولى معتمد جمال المسؤولية كتالت مدير فني وسط الموسم
والجمهور بيزداد دعم
وماتش ورا ماتش
تجربة معتمد بتنجح
والحلم اللي الجمهور زرعه في نفوس اللاعبين بيكبر
وربنا رزق الجمهور بأبطال لقصتهم مع الزمالك
معتمد وبيزيرا والدباغ وفتوح ومنسي وغيرهم وغيرهم
الجمهور
قدر يصنع نجومه
الجمهور الزملكاوي شال النادي على كتافه لحد ما حطه في نهائي الكونفيدرالية وصدارة الجدول
أما جمهور الأهلي
فهيفضل مهما كان انتمائك أكبر جمهور في أفريقيا
جمهور هتافه بيرعب أي منافس..
وكان بيخلي لاعيبة الأهلي وحوش بتطلع نار من بوقها فعلا
الجمهور ده
بدأ السنة بحلم كبير
النادي الأهلي عمل صفقات أسطورية مليارية
تريزيجيه.. زيزو .. بن شرقي .. محمد على بن رمضان.. ونجوم منتخب مصر كلهم تقريبا
فالجمهور حلم بمركز في كأس العالم للأندية
وحلم بالسيطرة على كل البطولات
لكن
الواقع جه
مخيب لكل الآمال
تقريبا الأهلي
خسر كل البطولات في الموسم الصفري ده
كأس العالم للأندية، كاس مصر، دوري أبطال أفريقيا، كأس عاصمة مصر، الدوري،
ومع كدا
جمهور الأهلي واعي
واقف في ضهر الفريق
صحيح التجربة قاسية وعكس تجربة الزمالك
فإذا كان جمهور الزمالك هو اللي خلى النادي يحلم ويصدق حلمه
هنلاقي إدارة الأهلي هي الللي خلت جمهوره يحلم ويحلم
وللأسف
صحي على واقع مر
صحي على فريقه العظيم بيخسر تلاتات على أرضه
من الترجي رايح جاي
من بيراميدز رايح جاي
ومع كدا
لسه الجمهور في ضهر الأهلي
وهيفضل
عارفين ليه الجمهور كدا
جمهور الزمالك وجمهور الأهلي
لأنهم الطرف الوحيد العفيف النزيه في المنظومة
الجمهور هو الطرف الوحيد
اللي مش بيمضي عقود
ولا بيجددها
ولا بيمددها
ولا بيقبض
ولا بيعتزل
ولا بيغير انتمائه
ولا بيكسل
ولا بيعمل إعلانات
الجمهور
هو الشريك اللي داخل بأسهم
الحب والحلم والتشجيع وبس
شابو كبييير
للجمهور الحقيقي في كل مصر
وخصوصا
جمهور القطبين
الزمالك
والأهلي
