علق محمود فايز مدرب منتخب مصر السابق فى جهاز هيكتور كوبر، على مباراة العودة القادمة للزمالك فى نهائى الكونفدرالية الإفريقية.
مباراة الامس والسيناريو الدرامى، علق محمود فايز بعد أن هدأت الأعصاب على حد وصفه.
وعبر صفحته الشخصية على موقع التواصل الاجتماعى فيس بوك كتب محمود فايز قائلاً :
بعد ما الأعصاب هديت والكورتيزول نزل في الدم…
بعد الاعتراف بجنون وقسوة سيناريو امس على أي زملكاوي.
لكن في النهاية مفيش قدامك غير إنك تتخطى، لاعيبة، جهاز، إدارة، وجمهور.
وحط تحت كلمة جمهور مية خط.
لأن جمهور الزمالك في مباراة العودة لازم يكون أول خط دعم ودفع للفريق، مش مصدر ضغط عليه.
والفرق هنا كبير جدًا.
كرويًا، وارد جدًا إنك تخسر ذهاب نهائي ١-صفر
ارجع واقول السيناريو يضايق اي حد… ولكن ما حدث قد حدث ولن يتغير في الأمر شيء
بس كرة القدم عمرها ما كانت لعبة منطق كامل، ولا حسابات مضمونة. الكرة اتخلقت علشان تفاجئ، وتقلب، وتكتب حكايات محدش كان متخيلها.
فرصة الزمالك في العودة كبيرة، وكبيرة جدًا.
اقرأوا تاريخ الكرة وجنانها.
واقرأوا تاريخ الزمالك تحديدًا، نادي عاش سيناريوهات كتير صعبة، ورجع منها، وكتب لحظات عظيمة فضلت في الذاكرة.
عيش حلمك للآخر.
صدق نفسك.
حارب على فرصتك.
ادعم فريقك بقلبك وصوتك وثقتك، مش بخوفك وتوترك.
الحلم لسه موجود.
الموسم استثنائي.
والتاريخ العظيم لا يُكتب إلا في الليالي الصعبة.
والسلام عليكم ورحمة الله.
