تحدث الناقد الرياضى فتحى سند عن أزمة ثلاثى الزمالك أحمد فتوح ومصطفى الزنارى وأحمد شريف فى رواندا.
وعبر صفحته الشخصية على موقع التواصل الاجتماعى فيس بوك كتب فتحى سند متحدثاً :
اللي حصل من أحمد فتوح ومصطفى الزناري وأحمد شريف في معسكر الزمالك برواندا مش مجرد واقعة عابرة، لكنه مؤشر على حالة من الانفلات اللي مينفعش تكون موجودة عند لاعبين محترفين بيمثلوا اسم نادي كبير بحجم الزمالك.
والأزمة الأكبر إن الواقعة دي بتفكرنا بأزمة سابقة حصلت من سنتين، وكان المفروض تكون درس وعبرة، لكن للأسف المشهد بيتكرر من جديد!
أنا شايف إن العقوبات المالية وحدها مش كفاية، وسبق وطالبت بعرض اللاعبين المتسببين في الأزمة السابقة للبيع، وبكرر نفس الرأي دلوقتي.. لأن الالتزام والانضباط مش اختيار، دول شرط أساسي للاستمرار في أي فريق كبير.
ومجلس إدارة الزمالك عليه مسؤولية كبيرة، لأن ضعف القرارات وعدم الحسم بيشجع على تكرار الأخطاء. والأزمة المالية مهما كانت صعوبتها، مينفعش تكون مبرر للتنازل عن المبادئ والانضباط.
رسالتي لكل لاعب: اللي مش هيحافظ على نفسه وعلى اسم ناديه، هو أول واحد هيدفع الثمن في النهاية.. والتاريخ مليان دروس، لكن المشكلة في اللي مش بيتعلم!
