وجه ابراهيم حسن مدير المنتخب الوطنى الاول رساله مؤثره للجماهير المصريه.
ونشر عبر حسابه الرسمى على موقع التواصل الاجتماعى "فيس بوك":
وكتب: اتقوا الله في مصر، ليه عايزين تكسروا فرحة الناس الطيبة والأطفال اللي رجعوا يحفظوا تيشيرت وشعار منتخبهم وألوان علم مصر؟.. اسألوا المصريين المغتربين عن أطفالهم اللي كانوا قربوا ينسوا ألوان وشكل علم بلدهم، افتكروا لمة الشعب وفرحتهم أثناء وبعد كل مباراة، افتكروا احترام العالم كله لمنتخب مصر
ليه الغل من زمايل لينا كنا بناكل في طبق واحد، وكنا حاملين شعار واحد وهو علم مصر؟.. ليه الغل من معظم الإعلاميين والحرب والهجوم غير المبرر في كل صغيرة وكبيرة، والتقليل من أي نجاح بنعمله؟.. ليه بنكبر الصغير على الكبير وبننسى الأصول اللي الشعب المصري متربي عليها؟.. افتكروا حسام حسن المخلص والمحب لبلده، اللي بينتحر علشان يفرح بلده، من منا بلا أخطاء ولا ابتلاء في حياته؟.. ورغم كل ظروفه الخاصة، عند شغله واسم بلده بيفصل وبيرمي كل حاجة ورا ضهره، ليه يتحارب بالشكل ده عند كل موقف؟.. ليه قبل كل معسكر بتتعلن علينا الحرب الشرسة دي؟
نصيحة ورسالة للزملاء اللي نفسهم يبقوا في مكانه، نجاحنا أنا وحسام هو اللي هيديك الفرصة بعد كده تبقى موجود مكانه، علشان اللي بياخد القرار يبقى مطمئن من تجربتنا ويديك فرصتك وما يخافش، وننسى الأجنبي، لكن لو أنا فشلت مش هتجيلك
معلومة ماكنتش عايز أقولها، هل تعلم إن حسام أصيب أكتر من مرة أثناء المعسكرات والمباريات والتصفيات، مرة بذبحة واتلحق بالصدمات في آخر لحظة، وبعدها بفترة صغيرة عمل دعامات، وبعدها بشهر دخل غرفة العمليات تاني، وقالوا ساعة علشان يضحكوا عليا، وفضلت منتظره يطلع من غرفة العمليات، وقعدوا يقولوا أي حاجة علشان ما تخضش، والحمد لله طلع وبرضه ما قدرش يريح، سبب المدة دي كلها، بعدها بأيام روحت المستشفى أعمل تحاليل عادية، قابلت الدكتور بالصدفة اللي عمل العملية، قال لي كنت مخبي عليك سبب التأخير، إن حسام بنسبة كبيرة ماكانش هيطلع من غرفة العمليات عايش، لأنها كانت في شرايين القلب وكانت معقدة جدًا
ومن المواقف مباراة البرازيل بعد العملية ماكانش قادر يمشي ولا يقف، وكان الوضع صعب علشان الكاميرات واللعيبة ما يحسوش بحاجة ويتأثر عليهم معنويًا، قولتله يقعد وأصر يقف على الخط.
