حرص أحمد عيد عبد الملك لاعن نادي الزمالك الأسبق والمدير الفني الحالي لجولدي، التعليق على أزمة محمود جنش حارس الأبيض و أمير مرتضى المشرف العام على فريق الكرة.
ونشر "عيد" عبر حسابه الشخصي عبر موقع التواصل الاجتماعي "فيسبوك" :المركب الي فيها ميت ريس بتغرق وفي الاخر الغلابة هيشيلو الليلة كالعادة ونطلع اتنين تلاتة كبش فدا من الكبار الي جبناهم السنة دي او الكبار القدام.
وأضاف، المهم بقي ان الجمهور عارف وفاهم مين بيحب النادي ومين بيميس ويهجص .... كالعادة مش عاوزين يخلو لاعيب الجمهور بيحبه شكله حلو والحدق يفهم الزمالك وبس..
وكان أمير مرتضى قد رد على جنش عبر حسابة الشخصي بموقع تبادل الصور "انستجرام" : هرد عليك قدام الناس علشان حقك و حقهم يعرفوا لأنك سألتني قبل كدة ورديت عليك بيني و بينك لما جيتلك البيت ورغم ان نظام الفريق منع الكلام في الاعلام و السوشيال ميديا بس هرد عليك.
وأضاف، لا السبب مش اصابتك طبعاً يا كابتن .. تقدر تسأل كل زمايلك في الفريق على مقدم الموسم الجديد حصلوا عليه ولا لأ !! جميع اللاعيبن بإستثناء اتنين لاعيبة فقط هما اللي حصلو على المقدم علشان كان عندهم ظروف طارئة يعني مثلاً فرجاني و بو طيب طارق حامد و محمود علاء و الونش و محمد حسن زيزو وعمر السعيد و عبدالله جمعة واوباما و غيرهم لسة مخدوش مقدم الموسم الجديد.
وواصل، اما بالنسبة للاعيبة الجديدة(الصفقات ) فالطبيعي ان يقبض المقدم مع التوقيع وفي برضه ناس لسة مقبضتش وقالو مفيش مشكلة نقبض مع زمايلنا بما انك سألت عن السبب قدام الناس فأحب اقولك ان الشركة الراعية متأخرة في دفع مستحقات كل الاندية حتى المقاصة كانت مش هتذيع الماتش بسبب مستحقاتهم تقدر برضه تسأل زمايلك في اندية تانية بإستثناء بيراميدز.
وأكمل، عقود الرعاية و البث التلفزيوني هي ٩٠٪من موارد النادي .. كان ممكن نبيع طارق حامد او محمود علاء او فرجاني و ندخل فلوس كتير النادي و ساعتها مكانش هيكون في ازمة سيولة بس ده كان ضد مصلحة الفريق .. كان ممكن منشتريش عواد وابو جبل و اوناجم وبن شرقي بالمبالغ دي و نجيب بدايل ارخص و نوفر برضه فلوس .. بالإضافة لمديونيات اكتر من ٥ مليون دولار على الزمالك اتدفعوا كلهم السنة دي ومشاكل مع الفيفا عقوبتها خصم نقاط و وقف شراء و بيع لاعيبة لمدة ٣ مواسم في حالة عدم السداد.
وأتم، اخرها كان من يومين عالعموم انت من كباتن الفريق و المفترض انك تستحمل زي ما زمايلك مستحملين ايه المشكلة فلوس تتأخر كام يوم!! زي ما الموسم اللي فات كنتوا بتاخدوا ٤ و ٥ اضعاف المكافأت ...بتمنالك الشفاء.
ليرد "جنش" على كلام المشرف على الكرة : انا برضه عندي ظروف و كلمتك كتير و خليت وكيلي يكلمك و كلمت ك زاهر وجيت النادي و حضرتك خلتني قاعد ٦ ساعات عشان ٢٠٠٠٠٠ الف جنيه و في الآخر حضرتك كلمت وكيلي قولتله أدي جنش ١٥٠٠٠٠ الف من معاك وعلي العلم برده انا عقدي مش كبير زي أغلب الاعبين اللي حضرتك زكرتهم و بعدين سؤال بس هو في حد استحمل النادي اكتر مني ودا مش كلامي دا كان كلام حضرتك صح برده والا ايه، اه حاجه تانيه المفروض لما اتصاب يكون ناديه اكتر حد داعم ليا وجانبي مش كدا والا ايه
