أعرب أحمد المرغنى لاعب نادى الزمالك الاسبق عن سعادته بالعودة الى جدران نادى الزمالك من جديد .
واصدر مجلس الاداره فى النادى قرار بتعين المرغنى عضو فى لجنة تطوير المواخب فى النادى .
وعبر فيس بوك كتب المرغنى قائلا :
من غير مقدمات انا من امبارح انا و امي و اهل بيتي في فرحة كبيرة جداً مهما كتبت و اتكلمت و حاوت اوصل الفرحة دي بكلام مش هقدر اوصفها.
وتابع : اولاً احب اشكر كابتن احمد الطيب الانسان المحترم Ahmed Eltayeb علشان هو اول واحد افتكرني و هو اللي كلم الاستاذ احمد مرتضي علشان ارجع تاني نادي الزمالك و فعلاً تواصل معايا الاستاذ احمد مرتضي و قالي انه مرحب هو و رئيس النادي المستشار مرتضي منصور و ساعتها مش هكدب عليكم مكنتش مصدق او مكنتش عاوز اصدق علشان مديش نفسي امل في حاجة انا عارف انها مش هتحصل
.
وأضاف : و بعد كدة كلمني الاستاذ احمد مرتضي و كابتن اسماعيل يوسف اللي كان بيكلمني تقريباً كل يوم علشان يرجعني النادي باي طريقة و في اي مكان و فعلاً رحت النادي و قابلت كابتن اسماعيل و كابتن طارق يحيي و المستشار مرتضي منصور و لنا هنا وقفة.
وواصل : مش هكدب عليكم مكنتش متوقع رد الفعل ده لكن بصراحة متكلمش معايا في اي حاجة و قالي انت معانا،
فانا واجب عليا اني اشكره لانه دلوقتي ليه عليا جميل و مش اي جميل ده نادي الزمالك اللي كنت طول الفتره اللي فاتت امنية حياته ارجعله في اي منصب او اي حاجة
.
وأتم : اخيراً مكنتش متوقع بصراحة رد الفعل ده من جمهور الزمالك العظيم و مكنتش متخيل ان الناس لسه فكراني و بتتمنالي الخير و بتدعيلي كدة ف مهما قولت و شكرت مش هوفي و لو جزء من حق اوفي جمهور في الارض
و بتأسف لاي حد كلمني او بعتلي رسالة او كتب كومنت علشان فعلاً جالي كمية رسايل و مكالمات انا مكنتش متوقعها انا اسف حقكم عليا.
