حذر الاعلامى سيف زاهر القطبين ، الزمالك والاهلى من خطورة فريق بيراميدز فى الموسم الجديد .
وأكد سيف زاهر أن الفريق السماوى سيكون فريق ثقيل جداً فنياً وكروياً بدون أدنى شك ، فى الموسم الجديد .
وعبر برنامجه الاذاعى قال سيف زاهر : بالوقت الحالى أصبحت لا أستطيع حساب قيمة فريق بيراميدز، ولازم الاهلى والزمالك ياخدوا بالهم أن الموسم الجاى مفيش هزار.
وتابع : الصفقات اللى بنسمع عنها وقيمتها المادية كانت لن تستمر لو هناك ميزانية معروف أولها وأخرها وعشان كدا الاهلى والزمالك لازم يبحثوا عن حلول عشان يقدروا يواجهوا الصفقات دى فى ظل إمكانياتهم المادية المحددة برقم معين.
وأوضح : أنا لا أهاجم إدارات الناديين كل منهم يسير بخطى جيدة ولكن لابد أن يبحثوا عن حلول خارج الصندوق لمواجهة هذه الأزمة، وهذا المنافس الجديد .
واعطى القطبين نصيحه : مش لازم نسلم لمقولة أن بيراميدز مهما يعمل صفقات مش هياخد بطولات عشان معندوش جماهيرية ، لازم الاهلى والزمالك يعملوا صفقات ويكونوا فريق جامد ، واللاعب الجامد يكون زى محمد صلاح وطارق حامد وعمرو السولية وأحمد فتحى ، بيراميدز مثلا فى الموسم الجديد هيكون فيه عبد الله السعيد ورمضان صبحى وأحمد فتحى وشريف اكرامى وعمر جابر والشناوى ، لأ فرقة جامدة بجد وموسم صعب جدا .
وانتقل للحديث عن الاسماعيلى قائلاً : فرقة مثلا زى الاسماعيلى أصبح حالها لايسر عدو ولا حبيب ، مراحتش ماتش الاهلى فى الاساس، قطاع الناشئين فى القلعة الصفراء اختفى فى ظروف غامضة والادارة كل اللى بتعمله مسكنات تتمثل فى تغيير اجهزة فنية دون أى تغيير على أرض الواقع .
وختم : لازم الادارة تصارح الجمهور وتضع خطة وتبدأ تنفيذها حتى يتحقق الاصلاح ولا نخسر الفرق الجماهيرية الواحد تلو الاخر.
