انتقد أيمن يونس، نجم الزمالك الاسبق، قرار أحمد فتحى لاعب الاهلى بتفضيل عرض بيراميدز على عرض النادى الاهلى ورفض الاستمرار فى الاحمر.
وقال يونس فى برنامجه الاذاعى : أحمد فتحى حبيبى وهو عارف كدا بس الغلط مينفعش منقولش عليه غلط، كنت ساكت مش عايز أتكلم بس الناس بتقولى اشمعنى بتقول تصرف كارتيرون غلط والباقيين لا.
وتابع : علشان كدا هقول رأيى لأول مرة فى قرار أحمد فتحى بالرحيل عن الاهلى والانضمام لبيراميدز .
وواصل يونس تصريحاته : أحمد فتحى نجم كبير إتربى فى الإسماعيلى ولكن فى الأهلى شاف العز كله، خير الأهلى على أحمد فتحى واضح زى الشمس، إعلانات وبطولات وتاريخ ومنتخب مصر، مينفعش يا أحمد تيجى تقول ياجماعة ده آخر عقد ليا وده احتراف ولازم أمشى، أنت غلطان يافتحى من هنا لحد أسوان مشى .
واضاف : كلمة عرض بيراميدز أكبر متتقالش للأهلى يافتحى، زى برضة ما هى متتقالش للزمالك ،حتى لو المقابل المادى لبيراميدز أربع أضعاف عرض الأهلى متقولش كدا، اللى عملته فى الأهلى يخليك تقول مش عايز حاجة تانى من الدنيا .
واستطرد : على فكرة الاحتراف يافتحى هو الالتزام والانضباط والانتماء أيضاً الانتماء فى الافعال والأقوال.. من حق جمهور الأهلى يزعل منك لأنه بعد ماكبرك تعمل معاهم كدا.. كل ده مالوش مخزون عندك يا أحمد، المفروض رصيد الأهلى عندك كبير، مش حسبة فلوس يابنى.
