طالب أيمن يونس، نجم الزمالك الاسبق، ادارة نادى الزمالك بغلق الدفاتر القديمة عند التفاوض مع مدرب أجنبى لخلافة كارتيرون .
وقال يونس : لابد من التفكير فى شخصية جديدة لبناء فريق فى أسرع وقت، معرفش ليه الزمالك بيدور فى الدفاتر القديمة مع المدربين.
وواصل : اللى مشى من عندك مشى بموقف سلبى معين وخلاص، عايزين ترجعوه ليه، مدرب هرب وآخر رحل من أجل الفلوس والتالت أنت طردته من النادى، ليه بندور عليهم تانى .
وتابع : ليه الزمالك مش بيدور على مدرب جديد يبنى عليه فريق، الزمالك عنده أحسن فريق، أنا ضد عودة المدربين السابقين، جروس لازم يعتذر وفيريرا ماشى بجرح إزاى نستأمنه تانى، سيظل قلقاً منا عشان راتبه وسنظل نحن قلقانين منه خوفاً من أن يهرب مرة أخرى، وإلا سنعين له حراسة شخصية على منزله 24 ساعة .
وأضاف : ابحثوا عن مدرب جديد مجاش مصر، يكون عنده خطة لبناء فريق بشكل سريع، التفكير فى القديم تكلفته صعبة واللى جاى هيبقى أصعب.
وأشار الى طارق يحيي قائلاً : بلاش نكون قاسيين على طارق يحيى اللى الترابيزة انقلبت عليه، نعترف أنه أساء التشكيل أمام أسوان ولكن بلاش نقسو عليه لان معندوش لاعيبة وواجه فريق محترم اسمه أسوان قدم مباراة كبيرة وعنده لاعبين متميزين مثل مو مرسى وكريم الطيب .
وتبقى كلمة : يذكر ان هذا هو رأى الزمالك اليوم الذى اعلناه منذ بداية أزمة رحيل الفرنسي ، بلاش الدفاتر القديمة .
