انتقد المدير الفنى لفريق طنطا رضا عبد العال تمرد مصطفى محمد مهاجم الفريق الاول الكروى من أجل الموافقة على احترافه.
وقال خلال تصريحاته: "إحنا كنا بندلل عليك يا مصطفى علشان ترجع منتخب مصر وحسام البدري يضمك ولما تقف على رجلك عايز تحترف".
وأضاف: "مفيش دكر في إدارة الزمالك يقدر ياخد قرار احتراف مصطفى محمد، والدكر اللى كان يقدر ياخد القرار مرتضى منصور ومشي خلاص".
وأشار: "أن الذين يديرون الكرة في نادي الزمالك ينفذون أجندة لتدمير الفريق، ولاد نادي الزمالك للأسف هم اللى بيوقعوا في النادي".
وتابع: "الله يكون في عون جماهير الزمالك.. ساسي بقاله سنة بيشحت كورة مش إنت اللى تعمل كده مع الزمالك والنادي هو اللى عملك".
وأكمل: "الزمالك مش هيقف على ساسي ولا أوباما ولا بن شرقي، واللي عايز يمشي يجيب عرض كويس علشان نحل الأزمة المالية في النادي".
وشدد: "إحنا مش بنلعب في مركز شباب، واللى بيتمرد بقولك على إيه لا أخدتوا دوري ولا كأس ولا بطولة افريقيا".
واستكمل: "بقول لمصطفى محمد إنت مش مكسوف من محمد شريف اللى جايب أهداف أكتر منك الموسم اللى فات وهو كان بيلعب في إنبي ودلوقتي أحسن منك".
واستطرد: "إنت لما كنت في طلائع الجيش كنت بتتمنى تلعب للزمالك ودلوقتي بتتنمرد على الزمالك عشان تحترف.. الزمالك له فضل على أي حد، ولو اللى بيعمله مصطفى محمد في الأهلي كانت اتقطعت رقبته".
وأتم: "أن مشكلة نادي الزمالك منذ أن كان لاعبًا داخل القلعة البيضاء تكمن في الصراع على الكرسي، مؤكدًا أنه ليس بديلًا لحل أزمات النادي الحالية إلا عودة مرتضى منصور أو إجراء انتخابات بشكل مبكر".